صباح الخير لكل من فى الجروب وكمان اللى من خارج الجروب، بقالنا كتير معملناش موضوع للدردشة زى ما قلنا قبل كده والنهاردة هنتكلم عن موضوع مهم جدا جدا

من خلال اللى بنشوفه من طلبات الناس واستفساراتهم بخصوص الدراسة حبينا نعلق على بعض النقاط، قد تبدو مختلفة لكن فى النهاية مشكلة واحدة، وهنوضحها مباشرة بالأمثلة:

أول مثال: محدش بيفكر يقرأ البوست المثبت إلا القليل طبعا، صدقنى لو قريته هتوفر على نفسك وعلينا وقت كبير وخصوصا لو قريته بعناية، وبالرغم من كده برضه احنا بنرد تانى على الاستفسارات سواء فى الخاص او العام بنفس الكلام اللى مكتوب فى البوست المثبت.

(هل المطلوب ان نقوم بتلقين كل شخص على حدة)

المثال الثانى: شخص ما يطلب مراجعة أوراقه وأن نقوم بكتابة السيرة الذاتية له بالرغم من وجود رابط يسهل من خلاله ادخال بياناتك وعمل السيرة الذاتية والتعديل فيها وقتما تشاء بكل سهولة وقد قمنا بالتنويه عنه مسبقا.

(هل المطلوب ان نقوم بكتابة السيرة الذاتية)

المثال الثالث: شخص ما يستهلك وقتا كثيرا فى الاستفسارات دون جدوى حقيقية، ما الداعى من ذلك طالما تعلم انك لن تقدم للدراسة من الأساس؟

المثال الرابع: طالب يريد أن نقوم بمراسلة الجامعة وتحصيل جواب القبول له بدون أن يبذل أى مجهود ويكتفى فقط بارسال شهاداته التى هى غير مترجمة وغير مصدقة

(بالله عليكم كيف ذلك)

المثال الخامس: أحد الاشخاص يسأل عن تفاصيل معينة باحدى الجامعات وعندما نقوم بإعطائه الصفحة الخاصة بالجامعة عن هذه المعلومات، يرد قائلا لا أستطيع أن أجدها، وعندما نراجع الموقع مرة أخرى، نجد المعلومات موجودة ووافيه.

(هل مطلوب ان ندخل ونبحث ونستخرج المعلومة وارسالها جاهزة)

المثال الخامس: احد المعيدين عندما طلب منه كتابة السيرة الذاتية باللغة الانجليزية، قام بترجمتها على جوجل

(حقا لا تعليق)

والأمثلة كثيرة، وشر البلية ما يضحك

احنا ليه بقى بنقول الكلام ده، عشان لما تطلب مساعدة، ابذل الاول قصارى جهدك واتعب لحد ما تقف معاك خالص وبعدين اطلب المساعدة وده شفناه مع ناس برضه بس للاسف قليلين جدا، ويستاهلوا ان الواحد يقف معاهم لانهم بجد حاجة تفرح، برغم أعمارهم اللى ممكن تكون صغيرة على عكس دكاترة فى جامعات ومعيدين المفروض انهم أساتذة للطلبة دى.

الناس اللى بتدور صح وبتستوعب وتقرا وحط ١٠٠ خط تحت كلمة بتقرا لان الباقى مفيش حد فيهم بيفكر يقرا وعايز المعلومة سهلة على طبق من فضة، الناس اللى بتقرا دى وبتجتهد بنبقى سعداء جدا واحنا بنساعدهم وعلى عكس الناس التانية، الواحد مش بيبقى حاسس غير بتعب نفسى وهو بيساعدهم ودول احنا بنسميهم مجموعة ضيوف الشرف (اكتبلى … اعملى … ابعتلى … كلملى … شوفلى)

واحنا بقينا ننصح فى البداية ومبنضيعش وقت معاهم بعد كده وأحب اقولهم انكم هتفضلوا متاخرين بسبب عدم نيتكم الحقيقية لبذل اى مجهود

اللى عايز بقى ما يعملش اى حاجة وحاسس انه مجرد تقديمه للورق بدون حتى وجود فكر واضح لديه هو عايز يدرس ايه او يعمل إيه، عندك الصفحات والمكاتب اللى بتقدم خدمات بمقابل لان بصراحة وقتنا مش ببلاش

ولما نقولك على اللى مفروض تعمله فلا تجادل لانك ببساطة لا تعلم شىء ولم تحتك بالموضوع من الاساس ولو حتى بالقراءة.

ياريت لو فى تعليقات او استفسارات تكون بس فيما يخص المقال ده، وشكرا ليكم.

ياريت تعمل Like و Share عشان غيرك يستفيد كمان