عنوان المقال (لا أحد يمتلك مفاتيح إسبانيا) ولا أى دولة تانية بالمناسبة.

العالم اللى احنا عايشين فيه صغير جدا ووجود الانترنت سهل أمور كتير من البحث والتواصل، وده بيخلى المنافسة شديدة وشرسة فى بعض الأوقات ولكن وصول أفراد لمعلومات معينة أو معرفتهم بأشياء نظرا لاحتكاكهم بيها دون الاخرين، لا يعنى انهم امتلكوا مفاتيحها وانهم أصبحوا الأمرين الناهيين فى هذا الشأن، ولو هنتكلم عن السفر لاوروبا بشكل عام سواء لدراسة او لغرض تانى فمحدش يقدر يقول انه عارف كل حاجة او يقول ان كلامه صح 100%، أو يقول ان هو ملم بكافة الامور والشؤون. ده أكبر دليل على عدم احترام الذات والاستخفاف بالغير. الكل بيجتهد عشان يوصل لحلمه أو يحقق هدفه والامور اللى ممكن تمشى مع فرد مش ضرورى تتحقق مع غيره حتى لو ظروفهم واحدة.

للأسف احنا عايزين المعلومة جاهزة بدون تعب وبدون بذل اى مجهود أو حتى نقرأ بعناية، وعايزين حد يفضل يحكيلنا هو عمل ايه عشان يعمل زيه بالزبط ويرجع يزعل ان الامور مش ماشية معاه. الموضوع باختصار انها PACKAGE على بعضها، قراءة وبحث ولغة ومعرفة بخبرات الناس واجراءات واعداد كويس لملفك عشان يكون قوى وينافس.

تلخيصا للأمور فيه شوية نقاط سريعة، خلوها فى بالكم

1، 2، 3 – ابتدى اتعلم لغة فى بلدك من اول لحظة تقرر انك هتدرس فى اسبانيا، حتى لو جاى تدرس لغة.

4- مفيش حاجة اسمها قبول مشروط، يا إما فيه قبول أو لأ

5- اللى بيقدم لجامعة فى اسبانيا، لازم يلتزم بالأوراق المطلوبة منه وخصوصا التصديقات والترجمات

6- الجامعات الاسبانية لا توزع اماكن قبول مجانا على الطلبة

7- كليات الطب والصيدلة والاسنان وبعض تخصصات الهندسة والفيزياء والتكنولوجيا الحيوية ونظم المعلومات، هى كليات عليها اقبال شديد فى اسبانيا لذلك أغلبها سيتطلب منك امتحان قبول وحصولك على درجة عالية

8- متنساش تقرا البوست المثبت عشان توفر على نفسك كتير من الأسئلة

9- الفيزا الدراسية واى نوع فيزا هو شأن قنصلى بحت، ويكون كاذبا من يقول أنه يستطيع أن يأتى لك بالفيزا، فقرار حصولك على الفيزا بيد القنصل فقط، كل ما نقوم به هو ارشادك لاستكمال ملفك جيدا واعطائك النصائح.

10- الجروب عشان نتبادل فيه الخبرات الخاصة بالدراسة والبوستات التى ليس لها علاقة بالدراسة لا تتم الموافقة عليها

11- البوستات الخاصة بالدعاية عليهم مراسلة الصفحة أولا قبل الاعلان

12- هناك بوستات لا يتم وضعها نظرا لتكرار الأسئلة، ونعتقد ان البوست المثبت يحتوى على قدر كبير من المعلومات، فنضع فقط الأسئلة الجديدة.

13- اقرا كتير عن الدراسة فى اسبانيا ودور فى كل مكان واسأل واتعب عشان تحقق هدفك

14- صفحة SPAIN STUDY SOLUTIONS بتقدم خدمات بأجر للناس اللى عايزة كده، لأنه ببساطة اللى قايمين على الصفحة مش هيشتغلوا ببلاش وفى نفس الوقت الجروب موجود ومليان معلومات واللى عايز يجتهد يتفضل، والصفحة ساعدت كتير وقدمت استشارات بدون اجور لانها ببساطة أمور معلنة.

15- النصيحة اللى دايما بنقولها انكم تتعلموا اللغة ولو حتى تبتدوا من البيت اون لاين وعملنا بوست مخصوص عن ده.

16- الناس اللى بتراسلنا ع الصفحة ومش هدفهم الحقيقى السفر للدراسة وكل اللى عايزينه فيزا يخلعوا بيها، مكانكم مش هنا، والقنصلية مش بتوزع تأشيرات وحتى لو صادف وقدرت تعمل ده، انت مدرك للعواقب بعدها لو لا قدر الله حصلتلك مشكلة. وللأسف انت بشكل مباشر بتصعب الامور على الطلبة اللى فعلا عايزين يسافروا للدراسة لأن القنصلية بتعرف وبتغير فى شروطها وطلباتها، زى ما أصبح مؤخرا فى بعض الدول عدم قبول الترجمات منهم ولازم تكون ترجمات فى اسبانيا أو شرط ان الطالب يعمل تأمين طبى سنوى قبل السفر (و ده غير تأمين السفر على فكرة).

17- اسبانيا بلد زيها زى اى بلد فى العالم، فيها مميزات وعيوب، الجنة مش ع الارض. وانت اللى بتقرر ايه اللى يناسبك ويمشى معاك.

18- الدراسة فى اسبانيا مش مجانية واغلب البرامج الدراسية بالاسبانى وفيه برامج بالانجليزى.

19- كطالب عربى، فيه نوع من الطلبة المهاجرين بينافسوك على اسبانيا وهما طلاب أمريكا الجنوبية وطبعا المنافسة معاهم قوية لانهم بيتكلموا اسبانى، فمعلش ابذل مجهود واتعلم اسبانى.

20- اسبانيا لسة مفيش فيها حساب مغلق زى المانيا ولا فيها تعقيدات كتير فى الاجراءات وحتى اللغة ممكن متقدمش شهادة لغة بس تثبت انك بتقدر تتعامل باللغة الاسبانية من خلال مقابلة فى القنصلية وده امر طبيعى.

21- أى طالب جاى يدرس فى اسبانيا لازم يقدم كشف حساب بنكى او ضمان مالى بواقع 532,52 يورو شهريا طول فترة دراسته أو لمدة عام يعنى حوالى 6390,24 يورو فى السنة. (الكلام ده من نص القانون الاسبانى)

22- تأشيرة الدراسة لفترة اقل من 6 اشهر لا تعطى حق العمل ولا حتى تنفيذ اقامة.

23- امتحان ال SELECTIVIDAD ملغى من سنة 2017 للأجانب وفيه نظام جديد وامتحان من نوع اخر اسمه PCE وفى حاجة اسمها اعتماد UNEDassis، حاجة كده زى ال يونى اسيست فى ألمانيا.

24- الماجستير سنة او سنتين دراسة وفيهم مواد نظرى وجزء عملى أو بحثى.

25- الدكتوراة مشروع بحثى بالكامل وليس بها دروس للتلقين.

26- مفيش حاجة اسمها سنة تحضيرى للماجستير والدكتوراة، فيه انك تتعلم لغة ماشى، لكن التحضيرى للبكالوريوس ومش كلهم كمان، فقط اللى محتاجين NOTA عالية عشان تخصصات معينة.

27- لو قريت البوست المثبت هتلاقى تفاصيل حاجات كتير، وكمان فى بوستات واستفسارات ع الجروب مردود عليها بالكامل.

ياريت لو فى تعليقات اواستفسارات تكون بس فيما يخص المقال ده، وياريت نقرا المقالات اللى فاتت 1، 2 وكمان البوست المثبت على الجروب، وشكرا ليكم.

ياريت تعمل Like و Share عشان غيرك يستفيد كمان