مساء الخير على كل اللى ع الجروب واللى كمان من برة الجروب، حبيت أدردش معاكم شوية بخصوص الدراسة فى اسبانيا وقلت كل شوية هندردش فى حاجة كده بحيث نلم الموضوع كله على قد ما نقدر، وهتكون عبارة عن مقالات وهحاول متكنش طويلة. كل مرة هنتكلم فى حاجة معينة ونركز عليها وتحت المقال هنفتح التعليقات والاستفسارات ليكم ونرد عليها بس رجاء تكون الأسئلة بخصوص الموضوع نفسه اللى تم كتابة المقال بخصوصه.

المرة دى مش هتكلم معاكم غير فى أهم حاجة وهى الفكرة نفسها، انت أو انتى عايزين تسافروا تدرسوا برة ليه ؟ أو يعنى خطتك ايه ؟ مرتبلها صح؟ ولا هو سفر وخلاص؟

ممكن حد يقولى إن ده العادى يعنى، وإن ده سؤال مش فى محله وأى حد عايز يسافر خصوصا لو كانت أوروبا، بس الحقيقة ان الموضوع مبيتحسبش كده أو بمعنى أصح مبقاش يتحسب كده، خلينى أشرحلكم شوية.

أوروبا دلوقتى مش زى أوروبا زمان من 20 سنة كده وأكتر، أيام ما كانت محتاجة يد عاملة كتير وفيها فرص عمل كتير. كمان الانترنت والتكنولوجيا اللى احنا عايشين فيها فى أخر 20 سنة خلو العالم كله حرفيا بقى قرية صغيرة، وأصبحت المنافسة عالية وشرسة ومفيش مجال لأى حد عادى، لأنك لازم تكون فوق العادى بكتير قوى. لو احنا فاهمين ده كويس هنعرف نشتغل على نفسنا صح ونقرر صح، ومتبقاش المشكلة اللى شاغلة كل تفكيرنا هى ازاى أخد الفيزا عشان أخلع، لأ انت هتروح وتاخد الفيزا بمقدرتك وبالشىء اللى يأهلك فعلا انك تاخدها وعشان شىء حقيقى انت مسافر عشانه، مش رايح أخبط وخلاص وزى ما تيجى تيجى. وبرضه فى النهاية موضوع الفيزا ده مجرد شوية إجراءات مستحدثة فى العالم كله بعد ما بقت الهجرات غير منظمة وبقى صعب التحكم فيها، بس تقدر تقول إن كل دولة وليها شروطها ونظامها، لكن الحكم فى النهاية على كفاءتك انت أو استكمالك للشروط دى واللى انا مبحبش أسميها شروط، هى طلبات.

أولا: بلادنا الحمد لله فيها مراكز لغات كتير جدا وكل اللغات ومعاهد خاصة وكورسات فى جامعات وكمان المركز الثقافى الاسباني، أعتقد انه من البديهى طالما نويت على إسبانيا، يبقى تعدى كده الأول تفهم كلمتين على الأقل حتى لو جاى تدرس لغة وقبل ما تنوى على بلد معينة، برضه كلف نفسك شوية واقرا عنها بس ياريت تقرا من أماكن صح لأن فى أراء كتير وكلمتين من الشرق والغرب فى أى موقع أو مقال بدون مراجع، كمان المواقع الرسمية للحكومات الأوروبية تقريبا مغطية كافة المعلومات والإجراءات وتفاصيلها، فاتعلم اللغة عشان تعرف تقرا كلامهم أو حتى تفهم منه شوية قبل ما تقول أنا مسافروخلاص. وحتى ياسيدى لو معاك جواب قبول من جامعة، برضه اتعلم لغة البلد عشان تعرف تمشى فيها وقلنا قبل كده ان مفتاح أى بلد لغتها.

ثانيا: شيل من دماغك فكرة ان فلان عمل كذا وانا عملت زي ما هو عمل، بس هو سافر وأنا لأ. الحقيقة ان الفكر ده موروث عندنا، ليه بقى؟، عشان للأسف التعليم بتاعنا كله تعليم حشو معلومات وحفظ وبس ونقل فقط بدون أى إبداع، للأسف بسببه بقينا جوه قالب، وعايزين دايما شىء قدامنا نعمل زيه. فلان فتح محل موبايلات، الشارع كله يفتح محلات موبايلات. فلان فتح كافيه نت، برضه الشارع كله يقلده، وهكذا. والنتيجة قدام عنينا كل يوم تكرار وتكرار لكن بيفضل الإبداع عند أول ناس فكروا ونفذوا فكرتهم. ولو بصيت حواليك هتلاقى ان فى زمانا دلوقتى الأفكار اللى ماشية بقت مختلفة زى أوبر مثلا وزى قنوات اليوتيوب واللى برضه بقى التقليد فيها كتير. المهم انك فى تعاملاتك عشان تسافر لازم تحط فى بالك ان مفيش حالة زى التانية أبداً حتى لو كل ظروفهم متشابهة، وأنا عارف ان الكلام ده ممكن يكون غريب على ناس بس دى الحقيقة، لأن مش بس العوامل الظاهرية هى اللى بتتحكم فى الموضوع ولا شوية الورق اللى بتقدمهم، اللعب دلوقتى بقى فى التفاصيل وأدق التفاصيل، ولو انت جاهز وواثق من نفسك متقلقش.

ثالثا: فى بقى حاجة مهمة جدا وهى ازاى أسوق لنفسى وأعرض ورقى بشكل حلو عشان أخد قبول دراسة أو أقدم ورق فى شغل حتى. مش منطقى أبدا انك يطلب منك أوراق بتتقدم فى جامعة أوروبية أو حتى أى جامعة وتبعت صورة بالموبايل، أو تبعت أوراق مش مكتملة وتقول أصل فلان عمل كده أو حتى تفتى من نفسك وتقول ما هو مش مطلوب. فى الواقع انت اللى بتضيع الفرصة على نفسك وخلى بالك ان منافسينك من الهند ودول شرق أسيا وكمان دول أمريكا الجنوبية بقوا فاهمين أكتر منك بكتير ومعديين بمراحل. الطالب منهم بيقدم ملف مزبوط مكتمل وأوراقه مستوفاه ومصدق عليها ومترجمة على حسب طلب كل جامعة وكل بلد. عيب أوى لما نبقى مش عارفين نعرض نفسنا صح من كتابة سيرة ذاتية، من تعامل مع الانترنت، من مراسلات، من حتى انك تصور ورقك مزبوط وتراعى انه طالع سليم وواضح فى الصورة. وبلاش تستسهل وخد الأمور بجدية لأن التفاصيل دى وجديتك فى الموضوع كله هو ده اللى بيفرقك عن غيرك.

المرة دى حبيت بس يكون الكلام عن مرحلة ماقبل السفر، وانت ازاى مستعد ومجهز نفسك ليها وده بغض النظر عن تكاليف السفر نفسها اللى ممكن نتكلم فيها بعدين.

ياريت لو فى تعليقات اواستفسارات تكون بس فيما يخص المقال ده، وشكرا ليكم.

ياريت تعمل Like و Share عشان غيرك يستفيد كمان